Çay kənarında bayram ovqatı: media və gənclər təşkilatlarının səmimi görüşü

Bu səhər, 21 iyul 2026-cı ildə Kürün sahilində təkcə peşə bayramı qeyd olunmadı, həm də media ilə dövlət qurumları arasında etimad və əməkdaşlıq körpüsü daha da möhkəmləndi. Səhər günəşinin ilk şüaları suyun üzərində oynayarkən Mingəçevir Kür Olimpiya Tədris-İdman Mərkəzində isti və səmimi bir süfrə açıldı. Mərkəzi Aran Regional Gənclər və İdman İdarəsi və “Kür” OTİM-in birgə təşkilatçılığı ilə baş tutan tədbir 22 iyul – Milli Mətbuat və Jurnalistika Gününə həsr olunmuşdu.

Mərkəzi Aran Regional Gənclər və İdman İdarəsinin rəis müavini Kamal Nəcəfli KİV təmsilçilərinə səmimi təbriklərini çatdırdı,  medianın cəmiyyətdəki roluna toxundu: “Mətbuat bizim üçün ictimai rəyi formalaşdıran, vətəndaşları operativ və düzgün məlumatlandıran körpü rolunu oynayır. Dövlətçilik dəyərlərinin təbliğində və gənclərin maarifləndirilməsində sizin rolunuz əvəzolunmazdır.”

Mingəçevir Kür Olimpiya Tədris-İdman Mərkəzinin direktoru Ceyhun Mirzəyev isə vurğuladı ki, belə görüşlər yalnız bayram ovqatı yaratmır, həm də real əməkdaşlığın qapısını açır.

Tədbir boyu media ilə gənclər və idman təşkilatları arasında faydalı əməkdaşlıq məsələləri geniş müzakirə olundu. Tədbirə qatılan Əməkdar jurnalist Fərman Nəbiyev, data.org.az səhifəsinin redaktoru Yeganə Nəbiyeva, “Mingəçevir” qəzetinin əməkdaşları Mirsədi Daşdəmirov və Mətanət Məmmədova, “Yeni avaz” səhifəsinin təmsilçisi Esmira Hidayətova, “Kanal32” MMC-nin təsisçisi və rəhbəri İnqilab Şirinbəyli və “Azərbaycan bələdiyyəsi” qəzetinin müxbiri İxtiyar Həsənli təkliflərini səsləndirdilər, gələcəkdə birgə layihələr və informasiya mübadiləsinin genişləndirilməsi barədə fikir mübadiləsi apardılar. Söhbət o qədər isti və açıq keçdi ki, vaxtın necə keçdiyini heç kim hiss etmədi.

Sonda bütün iştirakçılara hədiyyələr təqdim olundu və onlarla xatirə şəkilləri çəkildi.

Əvvəlki 1 of 2 Növbəti